درویش‌اوغلو؛ بیر دلی‌نین خاطره دفتریندن
درویش‌اوغلو[۱]
بیر دلی‌نین خاطره دفتریندن
گوز (پاییز) گونلری چوخ داریخمالی اولور. آلماندا، غربت‌ده، قیسسا، یاغیشلی، قارانلیق گونلر.بئله گونلرده گون اورتاسی ساعات بیره قدر یاتاقدان چیخابیلمیرم. بیر اؤنجه‌کی آخشام، “صاباح سحر تئزدن قالخیب ایشلریمی گؤره جگم” فیکری ایله ساعات اوندا یاتدیغیما قارشین، ائرته‌سی گونساعاتین چالماسی ایله گؤزومو آچیب، یاغیشلی، رطوبتلی، یاری قارانلیق هاوانی گؤرونجه ساعاتین اوستونه بیر یوموروق ووروب، یورقانی باشیما چکیرم. خیال دونیامدا درینلشمه‌گه باشلاییرام:
گونئی آذربایجاندا انقلاب اولوب. مستقل گونئی آذربایجان دؤلتی قورولوب. بو انقلابین رهبری و سونرالاری بو دؤلتین باشیچیسی محمد امین رسولزاده، سید جعفر پیشوری، عباس اوغلو حسینقولو، یوخسا ممدکاظیم حق وئردی یوخ، من اؤزومم.
اوتوز ایلدن بری آلمانین کؤلن شهرینده اولدوغوما و گونئی آذربایجاندا یاشایانلار ایله یاخیندان – اوزاقدان بیر ارتباطیم اولمادیغینا قارشین، گونئی آذربایجان میللتی منی انقلابین رهبرلیگینه و سونراسی قورولان دؤلتین باشچیلیغینا سئچیب. امام خمینی علیه الرحمه کیمی اؤزل اوچاق ایله، تتنه لی و تمتراقلی رسم و رسومات ایله گؤنئی آذربایجانا گتیریلمیشم. ایندی دؤلت باشچیسی یام.
سحر قالخدیغیمدا، یاتاق اوتاغیمین قاپیسیندا جوان بیر قیز خدمتکاریم حوله می حاضیر توتوب. یاشادیغیم قصرین ایکینجی قاتیندا اولان یاتاق اوتاغیما یاپیشیق حامام اوچ متیر ائنینده، یئددی متیر بویوندادیر. حامام خدمتکاریم یوخودان قالخماق ساعاتیمدان ایگیرمی دقیقه اؤنجه حامامین وانینی ایستی سو ایله دولدورار. یاتاق اوتاغیمین قاپیسندا حامام شئپیکلریمی (دم پائی لریمی) جوتلر، الینده حوله ایله حاضیر دورار. ساعاتین چالماغینی ائشیتدیکدن سونرا قالخماز ایسم، اون بئش دقیقه گؤزلر. اوندان سونرا یاواشجا قاپییا ووراراق منی اویاندیرار. “سحرینیز خیر اولسون، پاشام” دئیه گولومسه یرک حولَمی الیمه وئریب حامامین قاپیسینی آچار. یاریم ساعات ایله قیرخ بئش دیقیقه یه یاخین ایستی سو ایله دولو وانین ایچینده ییرقالانارام. یورقونلوق حس ائتدیگیم گونلر ده ایسه وانین باش طرفینده کی دوواردا اولان زنگه باساراق ماساژ خدمتکاریمی چاغیرارام.
ماساژ خدمتکاریم کئچن ایل دونیا قادینلاری گؤزللیک مسابقه سینده ایکینجی چیخان ایتالیالی آلئسسیا دیر. گؤزلیگینین یانیندا ادبلی، حؤرمتلی بیر خانیم دیر. سحرلری یورقونلوغومو چیخارتماق اوچون واندا ایستی سویون ایچینده اوتوزبئش دقیقه ساغیمی – سولومو اوغوشدورار. حامامدا اولدوغوم زامان ایچینده آشچیم، فرانسه لی لوسیا خانیم، میطباق خدمتکارلاری ایله بیرلیکده قاینالتی میزینی حاظیرلار.
من اؤزوم چوخ “خلقی” و “میللی” بیر انسان اولدوغوم اوچون تک باشیما قاینالتی یئمَرَم. بوتون کنیزلریم و نوکرلریم ایله بیرلیکده قاینالتی میزینه اوتورارام و اؤزومو بو عزیزلریم ایله یاخین حس ائتدیگیم اوچون اونلارلا بیرلیکده دئییب – گولرک قاینالتی یئیَرم. بو آرادا قاینالتی سالونونون ساغ کونجونده کی سِن ده موزیک اورکستریم سحر موزیکی چالار. موزیک اورکستریم سکگیز نفردن اولوشوب، بونلارین هامیسینی دا اوروپا دؤلتلرینین میللی اورکستلریندن آییریب گتیرتدیرمیشم. چوخ دویغولو و موزیکال اولدوغوم اوچون هر گون عینی ملودوینی دینلمکدن خوشلانمارام. هر گون آیری بیر ملودوی چالار اورکستریم. قاینالتیمین یاریسینی موزیک ایله یئیَرم. ایکینجی یاریسینی دا موزیک اورکستریمین اعضاسی نین قاینالتی میزینده اوتوردوقدان سونرا بیرلیکده یئیَریک. اونا گؤره قاینالتی یئمَگیمیز بیرآز اوزون چکر، ساعات اون بیره یاخین، موشاطام گلیب، منی گئیینمه اوتاغینا آپارار. ساققالیمی قیرخار، ساچیمی دارار، اؤزومه عطیر سپر، اوگون اوچون اویغون پالتارلار سئچر و منه گئیدیرر. گئینمه تشریفاتیم ایگیرمی دقیقه چکر.
گئینیب، حاظیرلاندیقدان سونرا، آیری دؤلت باشچیلاری ایله دانیشماق اوچون حاظیرلانما اوتاغیما گیررم. مشاورلریمدن بیریسی کیسینجرین اوغلو مایک دیر. مایک او گونکو دؤلت قوناغی ایله هانسی موضوعلار باره سینده دانیشیلاجاغینی، هانسی اولاسی (احتمالی) سورویا قارشی نه جور بیر جواب وئره جگیمی و سونوندا نه جور اؤز ایستگیمی اونا قاندیراجاغیمی، داها دوغروسو سون سؤزو اونون یوخ منیم دئیه جگیمی، دئملی اؤز ایستکریمی اونا تحمیل ائده بیلجگیمی کلمه – کلمهسینه اؤیگرَدر.
اؤزل دیپلوماسی پسیگولوقوم ایسه اریک فرومون قیز نوه سی مادیسون دور. مادیسون چوخ مهربان و انساندان آنلایان بیر خانیم دیر. دونیا مشهورو پسیکوآنالیتیکر اولان اریک فرومون قیز نوه سی، اؤزو ماساچوست اونیورسته سینده پسیکوآنالیز کورسوسونون مودیره سی اولموشدور. منیم کیمی بیر انسانا آنجاق بئله مشاورلر گرکلیدیر.
بو حاظیرلیقدان سونرا ساعات گون اورتادان سونرا ایکی یه یاخینلاشار. قصرین آشاغی قاتینداکی دیپلوماسی سالونونا ائنَرم. اون ایکی متیر بؤیوندا، دؤرد متیر ائنینده کی دیپلوماسی سالونونون گون باتانا ساری آچیلان بؤیوک پنجره لریندن سو ایله دولوب داشیب، شپه لنن اورومو گؤلونون قیراغیندا گزن فلامینگولارا، اوچان آغ قوشلارا باخاراق بیر فینجان قهوه ایچرم. سقف دن آسیلی اولان بؤیوک لوسترلین آلتیندا، سالونون بویا – بویونا دوزولموش گیردکان تاختاسیندان سئیقللنمیش و یاغلانمیش میزلر پار- پار پاریلدار. میزلرین اوستونده کی گوموش قابلاردا دوزولموش میوه لر، یئیه جکلر، کریستال کوزه لرده دوزولموش شرابلار، اورمو بؤلگه سینین اوزوموندن چکیلمیش وودکالار، آلما سویو، دیلیملَنیب دیسلرده دوزولموش قوهون – قارپیز انساندا دایانیلماز بیر اشتها آچار. اوبیری دؤلت باشچیلاری ایشلرینده بیرآز داها قیوراق ترپندیکلری اوچون، بیر چوخ زامان منیم حاظیرلانیب دیپلوماسی سالونونا گلمَگیمدن بیر – ایکی ساعات ائرکن گلرلر. آنجاق منیم اوچون اؤنملی دگیل. منی گؤزلمَلی دیرلر. اونسوزدا اونلار ائله – بئله بؤیوک آداملار ساییلمازلار. منی گؤزلَمه لری، اونلارین گؤزونده منیم دگریمی آرتیرار. بیر پارا گونلرده، چوخ گؤزلَمیش اولان دؤلت باشچیلاری داریخیب، یوخسا منیم گئج گلمَگیمی اؤزلرینه سایغیسیزلیق اولاراق دگرلندیردیکلری اوچون، مذاکره نی گؤزلمزلر. کوسوب قاییدیب گئدرلر. بئله گونلرده قصریمین بوتون خدمتچیلرینی، مشاورلریمی، موشاطامی، باغبانلاریمی ایچری چاغییرارام. اؤزوموز میزین باشینا اوتوروب، قوناقلار اوچون حاظیرلانمیش یئیه جکلری یئیَریک، شرابلاری ایچریک و سونوندا هامیمیز بیرلیکده میللی مارشیمیزی اوخویاریق:
بیز گوجلو بیر میللتیک
هئچ کسه باش ائگمریک
گوندوز – گئجه بیلمریک
دورمادان یئییب – ایچریک
هئچ کسی اؤنمسه مریک
چونکو بیر اوچ نفر بیر میللتیک
*****
کئچن جومعه گونو، دسامبرین اون بیری، یئنه بئله یاغیشلی و قارانلیق گونلردن بیری ایدی. گون اورتادان سونرا ساعات ایکی یاریما قدر یاتاقدا خیاللاریمین دادینی چیخارتدیم. قالخینجا، دوش فیلان توتماغا حوصلَم اولمادی. اوزومه بیر سو چیله دیم. بیر “صبحانه” یئدیم، بیر ایکی چای ایله بیر ایکی سیگار چکدیم. چوخ داریخمالی گون ایدی. بدنیمده آغیر بیر یورقونلوق حس ائدیردیم. گؤزلریمین آلتی توربالانمیش ایدی. نئچه گونلوک ساققالیم و دارانمامیش ساچلاریم آینادا اوزومه آغیز اگیردی. او گون نه ائده جگیمی بیلمیردیم. جانیم عراق ایچیب، خیاواندا میل دورماق ایسته ییردی. آنجاق خوش ذوق بیر انسان اولدوغوم اوچون هر عراقی ایچه بیلمیرم. جانیم ایچمک ایسته دیگینده یا هِنِسی ایچرم، یادا تکیلا. ماشینیمی مینیب، کوچه نین باشینداکی سوپرماکتده ایچمک اوچون بیر شئی آختاردیمسا دا جانیم ایسته دیگی عراغی تاپابیلمه دیم. کؤلن شهرینین اوچاق ائنیش – قالخیش میدانینا یاخیندا اوتوردوغوم اوچون، “گئدیب، ائنیش قالخیش میدانیندا دیوتی فری شاپ دان بیر شئیلر آلیم” دئیه فیکیرلشدیم. ائنیش قالخیش میدانینین اوزون سالونونو آددیملارکن، ایچری ده رِوِ (آلماندا اولان بیر زنجیره سوپرمارکت) ین بیر شعبه سی اولدونو گؤرونجه سئویندیم، “آهان، بوردا یاخچی بیر عراق تاپابیلرم” دئیه ایچری گیردیم. دوغرودان دا شانسلی ایمیشم. آختاردیغیم ایچجگی، دئملی هِنِسی نی تاپیب آلدیم. عراق شوشه سینی آسما چانتاما قویاراق، رِوِ نین قاپیسیندان چیخارکن، اون – اون بئش ایلدن بری تانیدیغیم بیر دوستوما توش گلدیم. باخیمسیز اؤز- گؤزومدن، پالتاریمدان اوتاندیغیم اوچون اونون گؤزونه گؤرونمک ایسته مَیَرک، باشیمی آشاغی سالیب، اوردان اوزاقلاشماغا چالیشارکن، حسین گؤزونو گؤزومون ایچینه تیکدی.
سلام قنبر،
سلام حسین قارداش،
نه وار نه یوخ، بس سن بوردا نه ائله ییرسن؟
“شهرده ایستدیگیم عراقی تاپابیلمدیم، بو سوپرمارکتدن عراق آلماق اوچون گلدیم” دئیه بیلمدیم.
مونیخ دن گلن بیر یولداشیمی گؤزله ییرم.
مونیخ دن گلن اوچاق بیرساعات یاریم یوبانیب.
یالاندان اؤزومو بیلیر کیمی گؤستررَک:
بله، بیلیرم. نه ائلَیَک، گؤزلَمَلیم دا. سن ده مسافر گؤزله ییرسن؟
بله،
حسین قارداش قدیمی یولداشلاریمدان بیری ایدی. منپیتسا توکانلاری اوچون مال ساتان بؤیوک بیر شرکتده کامیون شوفرلیگی ائله دیگیم زامانلار اونون دا پیتسا توکانی وار ایدی. تانیشدیغیمز دا بئله اولموشدو. اونون دا پیتسا توکانینا مال وئرردیم. چوخ مهربان، جانا یاخین، صمیمی بیر انسان ایدی. یوباندیغیمدا بیر پارا آیری موشتریلر کیمی باشیما چیغیرمازدی. یانلیش مال تحویل وئردیگیمده، عصبانی اولمازدی. چوخ سایغیلی شکیلده،
“قارداش، من بو پنیردن یوخ، اوغما پنیر سفارش وئرمیشدیم، بیلیرم سنین تقصیرین دگیل، سفارشلره گؤره مال سئچمک آنباردا ایشلَیَنلرین ایشی دیر. بو پنیری گئری گؤتور، اوغما پنیر گتیر”
دئیَردی.
چوخ صبیرلی و حؤصله لی بیر انسان اولدوغونا قارشین، اوگون چوخ هؤوشنه لی و تلاشلی اولدوغونو حس ائتدیگیمدن،
گؤزله دیگین قوهوملاردان دیر؟
یوخ، حزب میللتین باشقانی و باشقان یاردیمچیسی دیر. آیری اؤلکه دن گلیبلر. آنجاق مونیخ اوستوندن کؤلنه گلیرلر.
آیاغیم یئره یاپیشدی. حزب میللتین آدینی ائشیتمیشدیم. بؤیوک و سؤزو کئچر بیر حزب اولسا ایدی گرک. اوروپا اؤلکه لرینده اون – اون بئش مین عضوو، هئچ دگیل ایسه ایگیرمی – اوتوز مین ده طرفداری اولدوغونو تخمین ائدردیم. آدینی و آرمینی اینترنت ده چوخ گؤرموشدوم. بیر نئچه یول دا “کشکه من ده بو حزبین عضوو اولابیلسم” آرزوسو ایله عضویت ایستگی گؤندرمگه چالیشمیشدیم. آنجاق “سنین کیمی بی سروپا بیر آدامی بیز عضولیگه آلماریق” دئیه جواب آلاجاغیمدان قورخوب، بو ایشین خئیریندن کئچمیشدیم. حسین یولداشیمین بئله بیر حزبین باشقانی ایله ارتباطی اولدوغونو ائشیدینجه بیر آن بو آرزوم گئنه جانلاندی. “کشگه حسین قارداشدان منی ده اونلار ایله تانیشدیرماسینی خاهیش ائتسم” دئیه فیکیرلشدیم.
حسین قارداش، ایندیه دک منیم بئله فعالیتلریم اولمادیغی اوچون شرمنده یم. آنجاق بئله بیر تصادف اثری منی ده اونلار ایله تانیشدیرسان نه اولار؟
دئیه یالواردیم.
حسین قارداش ایسه بونو ائشیدینجه گؤزلری ایشیقلاندی:
هه، ائله یاخچی اولار، بیلیرسن، من آیری حزبلردن، جبهه لردن، تشکیلاتلاردان و پارلمانلاردان گلنلری ده بو آخشام هوتللرینده یئرلشدیرملی یم. بو اوچاق یوباندیغی اوچون اونلاردان شرمنده اولاجاغام. سنین ایشین یوخسا، سن بوردا بونلاری گؤزله، منده گئدیب اوبیری قوناقلاریمیزی یئر به یئر ائدیم.
سئوینجیمدن آز قالسین اؤرگیم سینَمدن چیخاجاق ایدی. سانکی منیم بو آخشام اؤزل بیر عراق اختارماغیم بیر تانری قورقوسو ایمیش. “دئمک کی تانیرنین لوطفو کیمی، بیلمه دیگیم بیر گوج طرفیندن بئله بیر تصادف اوچون بورایا گلمیشم.” دئیه فیکیرلشرک، سئوینج دولوسو:
چوخ یاخچی، حسین قارداش، من بونلاری گؤزلرم، سن گئت اوبیری قوناقلاری یئر – به یئر ائله.
حسین قارداش تشکر ائدرک تر-تلَیسک اوزاقلاشدی. اوچاقلارین ائنمک ساعاتلارینی گؤسترن تابلویا باخدیم. مونیخدن گلن اوچاغین ائنمه سینه دوز بیر ساعات یاریم قالیردی. اوتوردوغوم محله ائنیش – قالخیش میدانینا یاخین اولدوغو اوچون، تر – تلسیک ماشینا مینیب، ائوه سوردوم. الیم آیاغیما دولاشا – دولاشا ساققلایمی قیرخدیم. یوغوندوم. اوز – گؤزومه اودکولون سپدیم. بئله گونلریم اوچون پالتار دیلابیمدا حاظیردا توتدوغوم “پیلو پالتارلاریمی” گئیینیب، ائنیش -قالخیش میدانینا گئری قاییتدیم. ائنیش ساعاتلاری تابلوسونا گؤره اوچاق تازا ائنمیشدی. آنجاق مسافرلر هله چامادانلارینی آلیب، چیخماغا باشلامایشدیلار. اورگیمده توی – بایرام ایدی، “کسین کی بونلارین کؤلن شهرینده ده شعبه لری وار. حزب رئیسی ایله تانیشسام، بلکه بورداکی شعبه لرینده، یوخسا عضولرینین بیریسینه منی شوفر کیمی ایشه آلماغینی توسیه ائده بیلر.” دئیه فیکیرلشرک قارا گونلریم ساووشوب، آیدین و گؤزل گونلریمین باشلایاجاغینی گؤروردوم. هؤوشنه دن بیر آیاغیمی گؤتورب، بیر آیاغیمی قویوردوم. حزب باشقانی ایله نه جور دانیشاجاغیمی، هاردان سؤزه باشلایاجاغیمی فیکیرلشیردیم. بئله بیر انسان مطلق کی اقتصاد،حقوق، یوخسا سیاست بیلیمی دوکتورودور. بئله انسانلارین یانیندا منیم دانیشابیلَجگیم بیر سؤز یوخدور. هاردان سؤزه باشلایاجاغیمی بیلمیردیم.
گلن مسافرلره باخا – باخا، اون بئش دقیقه دن سونرا ایکی نفرین بیزیم دیلیمزده دانیشاراق یاخینلاشدیغینی گؤرونجه، “آهان کسین کی بو ایکی نفردیرلر” ئیه گئنه هؤوشنه دن اورگیم چیرپینماغا باشلادی. یوخاریدان آشاغی اؤز پالتاریما بیر گؤز سالدیم، کؤینگیمین یاخاسینا بیر ال چکدیم، پالتوومون دوگمه لرینی باغلادیم و قامتیمی دوز توتاراق اونلارا یاخینلاشیب، سرهنگین امرینه حاظیر بیر سرباز کیمی دوردوم. او ایکی نفر منه یاخینلاشیب، یانیمدان ساووشدولار. بیر شئ دئمه گه جرئت ائتمدیم. بیر – ایکی آددیم مندن اوزاقدا دوردولار. بیریسی من یاشلاردا، بیریسی ده ایگیرمی – ایگیرمی بئش یاش اوندان جوان، اوروپالی جوانلارا بنزر بیری ایدی.من “یوخسا بونلار دگیل” دئیه فیکیرلشیرکن، یاشلی اولان آدام جیبیندن موبایل تلفونونو چیخاردیب بیر نمره توتدو.
حسین بیگ، بیز بیر ساعاتدیر بوردا گؤزله ییریک، بس سیز هارداسوز؟
حسین آدینی ائشیدینجه، “آهان بونلاردیرلار” دئیه فیکیرلشرک اونلارا یاخینلاشیب، سلام وئردیم. “بَیگ لر، من حسین بیگ طرفیندن وظیفه لندیریلرک سیزی مشایعت ائدجگم” دئدیم. من یاشلاردا اولان آدام آلچاقلاییجی باخیشینی اوزومه تیکدی.
سیز؟
بله
آدام دوداغینی بوزرک مندن اؤنده یئرمه‌گه باشلادی.
“بیگ، بو یاندان گئتملییک، ماشینی بو طرفده پارک ائتمیشم” دئیه سسلندیگیمده، قاییدیب گلدیلر. منیم گؤستردیگیم طرفه یئرمه گه باشلادیق. بیر نئچه دقیقه سوسقونلوق ایچینده ائنیش – قالخیش میدانینین اوزون سالونوندا یئریدیکدن سونرا اؤز اؤزومه “سیز؟” سوروسونداکی سس تونونو بئنیمده خیردالاماغا باشلادیم. “آهان، بؤیوک بیر حزبین باشقانی اونو مشایعت ائتمک اوچون منیم کیمی بیر بی سروپا آدامین گؤندریلدیگیندن خوشلانمایابیلر. واللهی بونون تقصیری آرتیق منده دگیل ایدی.” آنجاق حزب باشقانینین بو سورودان باشقا هئچ بیر شئی دانیشمادیغینین ندنینی آنلاییردیم. بئله بیر انسان منیم کیمی بیر آدام ایله نه دانیشسین کی. اوروپا دؤلت باشچیلاری ایله نه کیمی قارارلارا گلدیکلریندن می؟ یوخسا بیزیم مملکتیمیزده قورولاجاق اولان دؤلتین دوزلگه سیندن (ساختاریندان) اقتصادی سیستمیندن، حقوقی سیستمیندن، بو مملکت اوچون حاظیرلادیغی آنا یاسا اؤن یازیسیندان می دانیشسین؟ بئله انسانلارین ذهنی هر زامان بئله مسئله لر ایله مشغول اولار. بو قدرینی آنلاییردیم و من ده سسیمی ایچیمه سالیب جینقیریمی چیخارتمیردیم.
سوسقونلوق ایچینده ماشینین دالی جعبه سینین قاپیسینی آچیب، بَیگلرین چمدانلارینی جعبه یه قویدوقدان سونرا، مینمکلری اوچون ده قاپینی آچدیم و آغیر و متین بیر “بویورون” ایله اونلارین ماشینا مینمکلرینی ایسته دیم. بیر – ایکی دقیقه سونرا باشقان بیگ اوزونو منه ساری چئورمَدن، دوز قاباغا باخا – باخا ائتکملی بیر سس تونوندا:
حسین بیگ اؤزو هاردادیر؟
بیلمیرم.
بس سیز کیمسینیز؟
منیم آدیم قنبر دیر.
اؤزوز کیمسینیز؟
بو سورونو آنلایا بیلمدیم.
“من قنبرم، بس من اؤزوم کیمم؟ اولمایا قنبر ایله من ایکی آیری آداملاریق. روح خسته خاناسیندا اولدوغوم زامانلار روح حکیمینه “من آیری آداملارین بئنیندن کئچن فیکیرلری اوخویورام” دئدیگیمده، “یوخ، ائله بیر شئی اولماز، هئچ کس آیری بیر آدامین بئنیندن کئچن فیکلری اوخویابیلمز. سن اؤزونو هم اؤزون کیمی همی ده آیری بیر آدام کیمی تجربه ائدیرسن” دئدیگینی خاطرلادیم. دئمک کی روح دوقتورو حاقلی ایمیش. من ایکی نفر ایمیشم. باخ بو بیگ بئله منیم ایکی نفر اولدوغومو گؤرور. کسین کی بو حزب باشقانی آیری تحصیلاتی نین یانیندا روح حکیملیگی دوقتورلوغو دا وار.” دیه فیکیرلشرک.
آدیمی بیلیرم، آنجاق اؤزومون کیم اولدوغومو بیلمیرم
هانسی حزبدن، هانسی تشکیلاتدان، هانسی جبهه‌دن، هانسی فرقه‌دن، هانسی پارلماندان سینیز؟
عؤمرومده بئله شئیلر ایله یاخیندان – اوزاقدان هئچ بیر ارتباطیم اولمامیشدی. آنجاق بو باشقانین منه بیر یاردیم ائده جگی آرزوسوندا اؤزومو شیرینلشتیرمگه چالیشاراق، “کامیون شوفری ایدیم، ایندی ده ایشسیزم، دئسم، منی اؤنمسمز، سونرا حسین قارداش دا منی تاپیشیرسا، امگی بوشا گئدر” دئیه فیکیرلشرک، ذهنیمین بیجاقلارینی قاریشدیریب، بیر سؤز تاپدیم.
من شاعرم
آدام تکبر دولوسو آلچاقلاییجی باخیشینی اوزومه تیکدی:
شعر دیوانلارینیز وار؟
خیر
بس نه جور شاعیرسوز؟
بیر شعریم گونئی یونان قلم انجمنین اینترنت صفحه سینده یاییلیب.
آدام بونو ائشیدینجه بیردن – بیره پؤرتوشدو. هئچ بیر شئی دئمدی. اوزونو پنجره دن ائشیگه ساری چوئریب، درین بیر آه چکدی. بوینونون دامارلاری قوروموش کیمی سیخیشدی. دؤنوب اوزومه باخمادان، گئنه او ائتکملی سس تونوندا:
سیزده جلسه یه گلجکسیز؟
بله
آغیر بیر سوسقونلوق آدامین چیگینلریندن آشاغی باسماغا باشلادی. نفسی آغیرلاشدی. اؤزونو آنلامسیز و بوش اولاراق حس ائتمگه باشلادی. دوداغینی بوزوب، درین فیکره گئتدی.
انسانلارین بئنیندن کئچنلری باخیشلاریندان، عضله لرینین دوروموندان، اؤزللیک ایله بویون عضله لرینین سیخیشماسی، یوخسا راحاتلیغیندان، چهره لرینین درسیندن اوخموماق اولدوغو کیمی اونلارین ذهنلریندن کئچنلر دریلریندن ده یاییلار. بیر آز دیققتلی بیر انسان، بونلاری عمومی شکیلده حس ائدر، آنجاق آیرینتیلارینا گیرمه گه حوصله سی اولماز. منیم کیمی دلی بیر آدام ایسه بئله شئیلره داها چوخ دیققت یئتیرر. آدامین ذهنیندن کئچنلری آچیق آیدین سؤزلر ایله آنلاتیر کیمی اوخویوردوم. “هن، دئمک کی بو حضرات دا بو توپلانتیا چاغیریلیبلار. من بو آداملارین گیردیگی توپلانتی یا آددیمیمی آتمارام. بونلار کیمدیر کی من اونلار ایله بیرلیکده، بیر سالوندا اوتوروم”
گونئی یونان یازیچیلاری اتفاقی آدیندا بیر اتفاق تانیمیردیم. ائله – بئله، اؤزومو حزب باشقانینین یانیندا اؤنملی بیری اولاراق گؤسترمک اوچون آغزیما گلن سؤز بو ایدی. آنجاق او آن دوغرودان دا بئله بیر یازیچیلار اتفاقینین اولدوغونو، و منیم آغزیما گلن یازیچیلار اتفاقی ایله بو حزب رئیسینین آغیر آنلاشمازلیقلاری اولدوغونا آرخایین اولدوم.
حزب رئیسی گئنه اوزونو منه ساری چئویرمدن:
سیزده گونئی یونان قلم انجمنینده عضوسوز؟
سؤز آرتیق بیر یول آغزیمدان چیخمیشدی. “یوخ بئله بیر قلم انجمنی تانیمیرام، یالاندان دئییرم” دئیه بیلمزدیم.
بله، من ده عضو ایدیم. آنجاق منیم شعرلریمین و یازیلاریمین نئجه لیگی ( کیفیتی) آشاغی اولدوغو اوچون، منی عضویتدن چیخارتدیلار.
آدامین ایچیندن یانار بیر آه چیخدی. یئنه اوزونو پنجره یه ساری چئویردی. آنجاق بو یول “یاخچی، گئری قاییت بیزی ائنیش – قالخیش میدانینا قایتار، بیز گئتملی اولدوق” دئیه فیکیرلشدیگینی، آچیق آیدین سؤزلر ایله کاغاذدان اوخویور کیمی حس ائدیردیم.
یاواش یاواش هوتله یاخینلاشیردیق. هوتلین قیرمیزی، نئون ایشیقلی تابلوسونو گؤرونونجه.
آهان، یئتیشدیک، باخین اورا سیزین هوتلینیزدیر
دئدیم.
ائوه یتیشیب، سلقه لی بیر سالاد دوزلدیب، ائنیش قالخیش میندانیندان آلدیغیم، چوخ سئودیگیم هِنِسی ایچگیمی ایچمَگه باشلادیم. بو آرادا موبایل تلفونوم سسلندی. حسین قارداشین آدینی گؤرونجه سئویندیم. حسین قارداش همیشه کی راحات و مهربان سس تونوندا، بیر آز دا اوتاناراق.
قنبر قارداش، سندن بیر خاهیشیم اولاجاق، سحر بیزیم بو حزب رئیسی ایله یاردیمچیسینی هوتلدن گؤتوروب، سالونا گتیره بیلرسن؟
“آی آلله یاخچی اولدو حزب رئیسی قاییدیب گئتمدی”، دئیه سئوینرک،
اولار، عیبی یوخدرو.
هامی ساعات سکگیزده سالوندا اولمالییق. من اونلارلا دانیشدیم. ساعات سکگیزه اون دقیقه قالاندا هوتلین قاباغیندا سنی گؤزله یجکلر.
باش اوسته
سحر تئزدن قالخیب، حزب رئیسینی آپارمالی ایدیم. بونو اؤزوم اوچون بیر شرف کیمی حس ائدیردیم. منیم کیمی بیر بی سروپا آدامین بیردن بیره حزب رئیسینین خصوصی شوفری اولابیلمه سی بؤیوک بیر شانس ایدی. اؤز – اؤزومه “بلکه بونلارین ایشی آلمانیادا بیر – ایکی آی چکر، من ده هر گون حزب رئیسینین خصوصی شوفری کیمی ایشلرم. بلکه ده آدام آیری تحصیلاتینین یانیندا بیر ده روح حکیمیدیر. خسته لیگیم باره سینده دانیشارام. بیگانه بیر دوقتور کیمی باشدان ساوما ائله میز. بلکه دردیمه بیر چاره تاپار” دئیه فیکیرلشرک ساعات اون بیرده یاتدیم.
ائرته سی گون ساعات یئددی یه اون بئش دقیقه قالا ساعاتین زنگی چالینجا، بو یول یوموروق ایله اوستونه وورمادیم، جیرریقا کیمی یئریمدن قالخیب، ساققالیمی قیرخیب، یوغوندوم و “بیر آز دا ارکن گئدیم” فیکری ایله ساعات یئددی یاریمدا حزب رئیسینین هوتلینین قاپیسینین قاباغیندا حاضر ایدیم.
ساعات سگیزه قدر هوتلین قاپیسیندا گؤزلدیکدن سونرا، نیگاران اولماغا باشلادیم. “اولمیایا بیزیم حزب رئیسنی آلمانین وزارت اطلاعاتی اوغورلاییب” دئیه فیکیرلشمه گه باشلادیم. بئله فیکیرلر منی چوخ راحاتسیز ائدر. یئریمده دورابیلمرم.روح حکیمیمین بئله وضعیتلر اوچون وئردیگی حب لردن بیریسینی آتماق ایسته دیم. آنجاق ماشیندا ایچمک اوچون سو یوخ ایدی. ائنیب بیر استکان ایلیق سو ایستمک اوچون هوتله گیردیم. هوتلین کانتینینده بیر نئچه نفرین بیزیم دیلیمزده دانیشدیقلارینی گؤرونجه سئویندیم. بیر استکان ایلیق سو ایله داوامی آتدیقدان سونرا، بیزیم دیلده دانیشانلاردان بیر خانیما.
باغیشلایین، من حزب رئیسینین شوفریم، ساعات سگیزه اون دقیقه قالاندا رئیسی میندیرجک ایدیم. رئیسدن خبرینیز وار می؟
دئیه سوروشدوم. او خانیم حزب رئیسینی بیر اؤنجه کی آخشام گؤردوگونو آنلاتدی، آنجاق نییه یوباندیغیندان خبری یوخ ایدی. مهربان بیر سس تونوندا.
بویورون بیر فینجان قهوه ایچین، اوتورون، ایندی گلر
دئدی.اوتوروب گؤزله دیم. ساعات آرتیق سکگیز یاریم اولموشدو.
یئنه او “پارانوئید” نگارانچیلیغیم تَپَمه ووردو. الیم آیاغیم تیتره مگه باشلادی. حزب رئیسینه بیر شئی اولسایدی، بوتون آرزولاریم هئچ اولاجاق ایدی. منیم هؤووشنم کانتینده کی لری ده هؤووشنه لندیردی. بیر بیری ایله پیچیلداماغا باشلادیلا. پیچیلدیلار آراسیندا “رئیسه بیر شئی اولسا، بوتون توپلانتی هئچ اولار”، “آلمانین اونون اوچون چوخ دا امنیتلی بیر اؤلکه اولمادیغینی بیلیردی” کیمی سؤزلر ائشیدیردیم. بیزیم دیلیمزده دانیشان وطنداشلار ایکی – ایکی، اوچ – اوچ هوتلدن چیخیب گئدرک کانتینده قالانلارین ساییسی گئت گئده آزالیردی. بو وضعیت منده آغیر بیر یالنیزلیق دویغوسو و قورخو یارادیردی. ساعات آرتیق دوققوزا یاخینلاشیردی.بیر خانیمدان یالواریرجاسینا ، “رئیسین آدی نه دیر” دئیه سوروشدوم. هوتلین رسپتسیونوندان رئیسین قالدیغی اوتاغین نمره سینی آلیب، تر – تله سیک اوتاغین قاپیسینا گئدیب، قورخا – قورخا قاپینی ووردوم. هئچ بیر خبر چیخمادی. دوردوغوم یئرده قورویوب – قالدیم. ساعاتیما باخدیم. دوققوز یاریم ایدی. آرتیق حزب رئیسنیین گروگان توتولموش اولدوغوندان آرخایینلاشماغا باشلادیم.پارانوئید نگارانچیلیغیم تپه مه ووردو. تر – تلَسیک، آشاغی قاتا ائندیم. بیزیم دیلده دانیشانلاردان هئچ کیم قالمامیشدی کانتینده. رسپتسیوندا اوتوران خانیما یالواریرجاسینا “پولیسه زنگ وورون” دئدیم. نه اولدوغونو سوروشدو. هؤوشنه و تیترمه ایچریسینده، “بیزیم حزب رئیسی اوتاغیندا دگیل، کسین کی باشینا بیر شئیلر گلیب، بیلیرسیز بئله اؤنملی انسانلارین جانی همیشه و هر یئرده امنیت ده اولمایابیلر” دئیه جواب وئردیم. رسپتسیونداک خانیم دا منیم قورخو و هؤووشنه لریمدن ال – آیاغینی ایتیردی. قالخیب من ایله اوتاغین قاپیسینا گلدی. ساعات آرتیق اونا اون بئش دیقیقه قالیردی. رسپتسونداکی خانیم ایله ایکیمیز قاپینی یاریرجاسینا وورماغا باشلادیق. بیر نئچه دقیقه سونراقاپی آچیلدی. حزب رئیسینین یاردیمجیسی داغینیق ساچلاری، پیسمیریقلی گؤزلری ایله، اؤزو قاپینین دالیندا دوراراق، باشینی قاپینین چاتلاغیندان اوزالدیب، نفسیندن عراق قوخوسو پوسگوررَک.
رئیس دوش توتور
دئدی. قورخو و هیجانلار ایچینده، منه هئچ ده ارتباطی اولمایان بیر سؤز گلدی آغزیما.
بس توپلانتی نه اولاجاق؟
دئیه سوروشدوم. رئیسین یاردیمجیسی چوخ سویوق قانلی و اؤنمسمز بیر سس تونوندا.
رئیسین داها اؤنملی بیر ایشی چیخدی. توپلانتیا گلمه مگه قارار وئردی. توپلانتینی ابطال ائتسینلر
دئیب قاپینی اوزوموزه باغلادی.
بوتون آرزولاریم سویا تؤکولدو. بلکه بیر شوفرلیک ایشی تاپابلرم، بلکه بو رئیس عینی زاماندا روح حکیمی دیر. دردیمه بیر چاره ائدر، کیمی خیاللاریم هئچه چیخدی. کور – پئشمان، سویوم سوزوله سوزوله ائوه قاییدیب، بیر اؤنجه کی آخشامدان قالان عراغیمی ایچرکن.
کشگه بو دلی لیکدن هئچبیر زامان ساغالماسام
دئیه آروزلادیم.
به نقل از «آوای تبعید» شماره ۲۳
[۱] -۱۹۵۷ ایلینده گونئی آذربایجانین توفارقان (آذرشهر) شهرینده آنادان اولدوم. ۱۹۷۵ ایلینده تبریزده فردوسی مدرسه سیندن دیپلم آلدیم. ۱۹۸۳ ده آنکارادا یؤنه تیم پسیکولوژیسی بؤلوموندن لیسانس آلدیم. بو ایللرده آذربایجانجا یازماغا باشلادیم. ۱۹۸۶ دان آلمانیانین کؤلن شهرینده یاشاماقدایام. ۱۹۹۳ ایلینده محاسبه چیلیک و وئرگی مشاورلیگی بؤلومونو قورتاریب و بو بؤلومده ده ایشله مه گه باشلادیم. روح بیلیمجیلیک (پسیکولوژی- پسیکوآنالیز) ده درینلشدیم و یازدیغیم قیسا ناغیللاردا پسیکوآنالیتیک باخیشیمین اورتایا چیخماسی آرتیق اختیاریمدا اولمایان بیر فنومن (پدیده) اولماغا باشلادی. بو ناغیللار گؤردوگوم و تجربه ائیله دیگیم انسانلار آراسی ارتباطلارین پسیکوآنالیز باخیشیندان بیر تجزیه تحلیی کیمی کاغاذا توکولورلر.
