شریف مردی؛ بیر آز خیال…
شریف مردی[۱]
بیر آز خیال…
اؤلومدن سونراکی ابدی حایات بیزیم بوگونکو حایاتیمیز قدر بیر سیر دئییل می؟
ویتگنشتاین
هانی بیر اعدام محکومو اؤلومدن بیرآز اؤنجه بئله سؤیلهمیش یا دا دوشونموشدو: «یوکسک و سیلدیریم بیر قایالیقدا، آنجاق ایکی آیاغیمین سیغابیله‌جه‌یی، دار بیر چیخینتی‌دا، دؤرد بیر یانیم اوچوروملار، اوقیانوس‌لار، سونسوز بیر گئجه، سونسوز بیر یالنیزلیق و هئچ بیتمه‌یجک فیرتینایلا ساریلمیش وضعیت‌ده یاشاماق زوروندا اولسام و بوتون عؤمروم‌جه، مین ایل بویونجا، حتی سونسوزا قدر او بیر قاریش تورپاقدا دورمام گرک‌سه، او شکیلده یاشاماق، بو آندا بیر ساعت ایچینده اؤله‌جک اولماقدان داها چوخ یاخشی‌دیر؟» یئتر کی یاشاسین، صیرف یاشاسین! نئجه اولورسا اولسون، آمما یئتر کی یاشاسین!…
سوچ و جزا ـ فیودور داستایفسکی
ائرته‌دن دورارام. آلیشمیش آدام‌لار کی صوبح تئزدن دوروب داها یاتابیلمیر، تعطیل گونلری بئله گؤزلرینه یوخو گیرمیر، اونلاردان دئییل ده یاتماغی چوخ سئویرم. ائرته‌دن دوروب خیابانلاری گزمک‌دن ذوق دا آلمارام. چاره‌سیزلیک‌دی. یاشاییرام هر حالدا. آج قالیر، توخ یاتیر نه فرق ائدهجک؟ گونلر گلیب منی سنی وئجینه آلمادان کئچیر. سون گونلریمیزه یاواش یاواش آددیملاییریق، یوخسولو وارلیسی دا یوخ. بونلارین دئمه‌یینه ده گرک یوخ! فلک همشه بئله گلیب بئله ده گئده‌جک. ایندی من دوروم قاباغیندا کی خئییر ائله دئییل بئله‌دی، توتوب قولاغیمدان بیرین ده پئیسَریمه یاپیشدیریب سونرا یولا گتیرر. نه یاخشی کی گیلئیلی اولماییم…
هه. اوزاق توشمه‌ییم. ائرته‌دن دورارام. آلاقارانلیق. بوینو اَیری چلینگیمی بیر ده دالیمجا چکدیییم تکَرلی چانتامی گؤتوروب خارراخار سورونه سورونه هر کوچه باشی خیابان خیابان زیبیل قابلاری آختارارام. شاشیرمایین. یاشام چتین اوزونو گؤسترمک‌ده‌دیر منه! اوزلرینیزی ده تورشوتمایین کی کیرکثافت ایچینده‌یم. سیزدن منه مندن ده سیزه توخونولاسی شئی یوخدور آرادا. آتمیش دوققوز یاشیمدا منی نئجه گؤروب یارغیلادیغینیز دا هئچ وئجیمه دئییل. دیری ایکن یاشاماق لازیم، او اوزدن ریزقیمی باشقالارینین چؤله آتدیغی زیبیل ایچینده آختاریرام.
سؤز راضیلیق‌دان یوخسا زامانین قدّارلیغینا اویماق‌دان گئتمیر. آیری جور باخیلسا، باش سوخوب زیرزیبیل ایچینده دیری قالماغا چالیشماق‌دا اوقدر ده کؤتولوک یوخ. بیرآز دا خیال لازیم‌دیر البته، اوندا گؤررسن کی گئندن باخانلارین دوشوندویو ترسینه یاخشی زادلار دا وار.
قوخو، پیسلیک، اییرنج اییرنج آخیشان سولار وار واراولماغینا. بونلاری گؤرمزدن گلمیرم. هر شئی‌دن پیس بورنا سوخولان ایتی قوخودور ایلک یاخینلاشمادا. اویان‌بویانا قاچیشان هوندور سیچانلار. ایستی هاوالاردا داها پیس… اییرنج و رذیل سولاری اولان موشامپالارا یاخینلاشمارام هئچ، اونلار دا قاچیلمازدیر آنجاق. پینتی آداملارین زیبیلی یوخسا جیریق موشامپالار هریانی بله‌شیک ائله‌ییرلر ایستر ایستمز. یاشیما گؤره بیرآز ترپه‌نیشیم اوزانیر. قدیمکی قیچ قولوم قالماییب داها. الک‌ولک ائدیب ایسته‌دیییمی تاپاندان سونرا، اونو درین قابین ایچیندن چیخارتماق اؤزو یئکه چتین‌لیک‌دیر. ایلیشه‌بیلن یئری زادی اولسا چلنیگیمین بوینونو ایلیشدیریب چیخاردارام، اولماسا ایکی قول یاری بدن اَییلیب قابین ایچینه (گوجوم چاتماز زیبیل‌قابینی اَیم) چالیشا چالیشا چیخاردارام. چوخ دا دَرینه جوممارام، ائله اوزدن درده دَینی آختارارام. تاپدیغیمی ایکی اوچ چالیشمادا یوخاری گتیرسم سئوینمه‌یه اوره‌ییم ده وار گؤیلوم ده وار. یاشام دولودور بئله‌بئله گؤزل شئیلرله. بئلیم بیرآز بوکوک اولسا دا، انگل تؤره‌تمز ایشیمده. یاواش یاواش ایشیمی گؤررم. البته خیاباندان کئچن‌لر اولور و هرکس اؤزونه گؤره بیرجور باخیر آداما. باخسین. لاپ گؤزونون ایچی ایله ده باخسین. اویون آچان منیم باشیما آچمیش ایندیلیک. کیم بیلیر کیمین باشینا نه‌لر گله‌جک؟ اویون‌بازدی بو فلک…
شانسیم گتیرسه درده‌دَین شئیلر آز تاپیلمیر. یانی خوش گونلریم ده اولور آراسیرا. بئله‌نچی خوشلوقلارا سئویندیییم گؤرمه‌میشلیییمدن دولایی دئییل. بیرزامانلار قیز یوخ ایدی داغا داشا، یئمک‌خانایا، سینمایا گؤتورمه‌ییم. بوللو سوللو خرجلردیم. داغ داش دَلیسی ایدیم. آمما اویون بئله گلیب! کارتون، پیلاستیک، خیردا چؤرک… قاباغیما گلن قیویرزیویری آییریب قارنیمی دولدورورام ایندی.
گؤتوردویوم قیزلاردان یوخسا دیرماشدیغیم داغلاردان واز کئچیرم. دوروم هله‌لیک اوقدر ده آغیر دئییل. بیر ده‌کی ایندی دای زیبیله سیغینیب چؤرک چیخارتماق قاباقلار کیمی عار دئییل. لوکس ایش اولور یاواش یاواش. ماشینی اولان، یاخشی پالتار اَینینده اولان… بوندان قاباق زیبیله باش سوخانین اَنینده جیرجینده اولاردی، اؤزوده بعضن چؤرک تاپمازدی باشین توخ قویسون یئره. زامان گون‌به‌گون تازا دونا گیریر… عارسیز دئییلم آمما بوجور شئیلر ده گؤزومده دئییل‌دیر هئچ زامان. اؤز ایشیمده اولارام. ائرته‌دن دوروب سورونه سورونه گونده‌لیک خرجیمی چیخاردیب دؤنرم یوواما. مرتضوی‌دن آشاغی، ایتیب باتان چیخماز بیر کوچه‌نین دیبینده اوچ قات یوخاری دیرماشان پیلله‌لرین آلتیندا سوخولوب یاتیرام. کیمسه‌یه ده آزاریم دیمز. اونسوز دا اوستوراغا باغلی اولان دیوارینان منی ایچینده یاشایان آداملاردان آییرمیشلار. سارالمیش قاپی‌سی دا وار ائویمین. بیر زامانلار چؤل قاپیمیز بیر ایدی باشقا آداملارینان. سونرالار ایسته‌مه‌دیلر اونلار گیرندن من ده گیرم. ائله‌بیل من چیخان یئردن چیخماییب یوخسا من گیره‌جه‌ییم یئره گیرمیه‌جکلر. اودوکی بیر دلیک بری یاندان آچدیلار و سارالمیش قاپی دا اولدو منیم دروازام. ایستی هاوالاردا تر ایچینده بوغولسام دا سویوقلاردا یاخشی‌دی. سیزاق گلیرکن یورغانین آلتی یوموشاق ایستیلیک باغیشلاییر آداما. سیخیلارام لاپ دیبه، یورغانی چکرم باشیما، بوکولوب رادیونون خیششاخیش‌ینا قولاق آسارام. دیز آغریسی بعضی گئجه‌لر بیرآز آمانیمی کسیر آمما ائرته‌لر یاخشی شئیلر یولومو گؤزله‌ییر دئیه دیک قالخارام. هینناهین ایله البته.
جیحونو اوزویوخاری گئدرم من. دای کمیل، مالک اشتر، امام خمینی زاد باشقالارین الینده. بیرآز اوزویوخاری‌دی… آمما دای ائله بئله گلیب دای. اورالارا دا گیرسم گیررم‌ها. کیمسه‌نین ترپنَجه‌یی قالمامیش قوجادا ایشی اولماز. هاشمی یاخشی‌دی، امام خمینی‌ده بیرشئی اولماز. هردن هاشمی‌یه گیرر بیرآز باشیمی اورا بورا سوخارام. آمما گئنل‌ده آزادی خیابانیندان یوخسا ائله مرتضوی‌دن باشلاییب بو سیرانی سیلیب سوپوررم اؤزومه. یادگار اوزاقدا، کمیل‌دی، خوش‌دو، اولارا دا گئتمیشم گئتمه‌یینه، آمما ائله جیحون‌دو آلت اوست ائتدیییم. بیرشئی قالمیش اولساها او دا… دئییرم کی ال چوخالیب. آخشام باشی وانئتینن جاهیل جاوان ایکی‌نفر لاپ یالار خیابانی. قالانینی دا بعضن چؤپچولر یوخسا اوبیریلر چکرلر باشلارینا. منه نه قالاجاق؟ همی باشاریسیز همی ده کی سحرسحر بوشالدیب یویوبلار دا قابلاری. آخشام شولوقلوغوندا ایشله‌مرم، قیزیل ده تؤکسه‌لر. پیس عادت‌دی آمما دا نئینئییم؟
شابلونلاشمیش فیکیرلر ده گلمه‌سین آغلینیزا. ساققال ماققال باسماییب بیله‌می. کیرکثافت ایچینده ده بوغولمورام. اوزه‌ریمه چکدیییم یورغان ترتمیز یورغان‌دیر. تمیز یاشارام. اؤزومه گؤره غروروم وار. اؤرنه‌یین ایکی هفته اؤنجه گومانیما بیر یا ایکی کره ایشله‌نمیش ژیلئت تاپدیم، او یوغونلاریندان کی باشینی دییشمک ده اولور. هله واریم و کاریما دا گلیر. هفته‌لیک حاماملاریم یئرینده. ترتمیز.
بیرگون دیبینده اییرنج سو سوزولوب قالان دورو موشامپانین ایچینده قارا بیر شئی گؤردوم. چلینگیمی ایلیشدیریب چکدیم یوخاری. بیرآز اویان‌بویان ائله‌دیم (بیرداها زیبیل‌قابینا آتماق ایسته‌دیم) سونرا دوگونو آچدیم. ایلک دوگون راحت آچیلدی. اونون ایچینده بیر موشامپا داها وار ایدی، اونون دوگونو آچیلمادی کی آچیلمادی. آدام دئییر ننه‌سینه بایراملیق یوللاییر. یاواش دوگون وور دا! آچابیلمه‌دیم. ایسته‌میردیم دیبینه ییغیشان آغ یاشیل چالان رزیل سو اوستوباشیما داغیلسین، اوناگؤره جیرمادیم. اوره‌ییمدن ده گلمیردی سالام دیشیمه. باش بارماغیمی چالیشدیم بیرتهر سوخام ایچینه. تورشامیش پیس قوخو بارماغیم موشامپانین ایچینه گیرجه‌یین بورنومو یاندیردی. لعنته گلمیش… قاتی سودان بیرآز تؤکولدو شالواریما.
بیلمه‌دیم نییه بونو آچدیم. تاپدیغیم ژیلئت اؤزل بیریسی دئییلدی هئچ. پیرپئشمان اولدوم آچدیغیم موشامپادان. دیشیمین دیبیندن چیخانی یاغدیردیم گؤت‌ورن یییه‌سینه. آغزیماگلنی ده توپوردوم صیفتینه. بیرآز اؤره‌ییم سویویاندان سونرا باخدیم ایچینه. پیچاغینان کسیلمیش ایکی یاریم بربری، ایکی آشا بله‌شمیش کاسا، ایکی قاشیق، خیلک بلشیک سیله‌جک… و بو ژیلئت! اوغلان ائوی بوشالداندان سونرا قیزا دئییر گلسین. بلکه قیز دا اوغلان دا تهرانلی دئییل… اوغلان اؤز یولداشیندان ائوینین بوشالدماسینی ایستر… یالوارار کی قیز گئدیرهااا سن آللاه… آچاری آلار دوستوندان. سئناریولار دوزولدو قافامدا… قیز گلمه‌میش اوغلان حاماما گئدر، اؤزونو ترتمیز ساهمانلار. قیزین گلمه‌یینه هله اون بئش دقیقه قالمیش. چیخار کوچه‌نین باشیندان ایکی کاسا آش آلار. بلکه ده زنگ وورار قیزا کی یولوندا ایکی کاسا دا آش آل گتیر. ائوده بیر ساریلاندان سونرا تله‌سیک آشی ایچر سونرا یئنه ساریلارلار. کاسالاردان بیرینی ده قیزین آغ بودو باسیب بؤکوب ازَر… یوغون بود ائله سیخیب کاسانی کی… سیله‌جک‌لر چوخدو موشامپادا… سوزولوب بودون اوستوندن آخیشان آغوووش سو سیله‌جک‌لری اوردان کاسانی اوردان دا هریانی باسمیشدی… آشین سویونا قاریشمیش… قول قیچ بود قاناد… هر شئیی ییغیشدیریب موشامپانین ایچینده (تله‌سه تله‌سه بربریلری ده اولارین اوستونه) قویوب، برکیدیب چؤله چیخاندا گوله گوله آتیب زیبیل قابینا اوردان دا یوللانیب شادمانا مینسین قطار دوراغینا قیزی یوللا سالیب…
قیز گئدیب خیال میال چکیب آپارمیشدی بیله‌می. گؤردوم اوتورموشام. ژیلئتی قاپیب بربری پاراسینی قویوب چانتاما یوللاندیم. به نییه کاندوم ماندوم یوخودو؟ قاییدیب باخماق ایسته‌دیم، گولدوم اؤزاؤزومه. اوغلان ائله تله‌سیب کی آراداکی نازیک واسیطه‌نی اونودوب. خیابانلار داکی اوقدر داردی… بیرآزدان دا گلیب قابلاری یویاجاقلار.
یول اوزو آشاغی ائندیکجه (اوزویوخاری ییغمارام. قالخیب ائله جیحونو اوزآشاغی یاواش یاواش ائنرم) بیر الیم دالیمجا سورونن چانتانی چکیر اوبیری ده چلینگه دایالی، هله بهنودا یئتیشمه‌میشدیم آغ دامجی سوزولوردو گؤزومون قاباغیندا بولور بودون اوزه‌ریندن… قیپ قیبراق… ژئله… قیچیم گلمیردی. سرسم اولوردوم. بودون اوزه‌رینده دامجی آخینیب آخینیب سوزولوردو. دؤندوم بهنودا. بالاجا پارک وار بهنوددان طوساجاق چکیلیب. اوردا آذان چاغی واخ بئواخ منیم کیمی قارتیمیش قوجالار گلیب چابالارلار. گون چیخانا قدر قاچیب دارتینان وار دستگاه‌لارین یانیندا. آدی یادیمنان چیخیب خارابانین. قاپانی دا وار اؤزوو چکه‌سن. ائرته‌لری ده چولاق مولاقلاری آیی اوینادانا بنزر سووو شیرین بیر قانجیق اوینادار. ورزیش وئرر یانی. اوردان کئچه‌لی دال قاباق اویناییشینا باخارام جئیرانین. بو کره لاپ بئله آیا دئمیشدی سن چیخما من چیخارام. اؤزو ده سحرسحر. جیبیمده‌کی ژیلئتی برک توتوب دابانیمی اوینادیردیم قویروق اوینادان کؤپکلر کیمی. باخیب ائله‌سه قویروق باسیب ایتیلَردیم. خانیمین دینگیلتیسی آیاق اوسته لایلای چالیردی بیله‌مه ائله‌بیل. اورتادا سفئی بیر موزیک ده واردی… موزیک هارا بونون بودو هارا. هئچ زامان موسیقی دیقتیمی چکمَییب. آمما باجاق‌ماجاق نییه، گؤیلون ایسته‌یینجه.
دوغروسو پارک منیم دولاندیغیم یئرلردن دئییل آمما دای چکیر هردن گلیب بیر اوتوروب دینج آلاسان. گؤزل مؤزله باخاسان. کافتارلارین چوچالاماسینا گوله‌سن… چکیلیب گلمیشدیم بو کره ده. ایش گوجو قوتولونجا گیریب اوتاغینا پارپالتارینی دَییشدی. مانتوزاد گئیدی. بیر آز گؤزدن دوشدو بیزیم بو گؤزل. آخی او شالوار هارا بو قاراسی هارا. بود همن بود آنجاق گؤرکمی باشقا ایدمان قیافه‌تینده. خانیم باشقا دونا گیرینجه گؤزوم ایکی نیمکت اویانلیق‌دا دیکَرمیش بوقچاکیمی بیر شئی سئزدی. شیغیدیم اوستونه قوجایانا. اوستونو آلینجا بئش اون کره اویان‌بویانی دهَتله‌دیم. کیمسه‌نین باخیشی آلتیندا دئییلدی بوقچا. یاواشجانا قولاغیندان توتوب ایلیشدیردیم چانتاما. گؤزل مؤزلی اونودوب تودابانا خارراخار.
قلبیم لاپ آغزیما قدر قالخیب دارتینیردی. بیلسه‌یدی ده بیری نه دئیه‌بیلردی؟ بیرآز اویان بویان… دیل تؤکمک زاد. قوجالیغین هئچ زادی یاخشی اولماسا بیر بو خاصیتی یاخشی‌دی. کیمسه اوجور توخونمور آداما.
بورخولدوم طوسا. اوردان جیحونا چیخینجا دینجه‌لدیم بیرآز. چوخدان بری جیحون منیم اولموشدو. مولکوم مالیم کیمی ایدی. زمزَمدن قاباق گلمیشم بورا. شوخلوق دئییل کی. تهران بئله‌دی دا! خاراب قالسین. زمزم بؤیودو بیز خیردالدیق. او شیشدی بیز کیچیلدیک. او قالخدی بیز ائندیک. خیابانلاری گئنیشله‌دیردیلر های کویله… بیز گولوردوک. سئوینیردیک داردودوک یولاقلارین آغیز آچماغینا. گوله گوله ده قیسقیریلیردیق داها دا آشاغیلارا. جرثقیللر، بتن فیشقیردانلار داررادار خارراخار ایشله‌ییر… چانتامی چکیر جیحونو اوزآشاغی توتموشدوم. دامپزشکیه چاتمامیش دئدیم به گؤروم بوگون آللهیم نه قویوب اووجوما! بلکه بوگونون ریزقی لاپ ائله ایلک باشدان وئریلیب. دای قالانی رادیو خیشاخیشی و یورغان مئهله‌نمه‌سی پاییما توشوب. کیم دئییب یوخسولون آللاهی یوخ؟
هله نه چیخا قاباغیما یاخشی‌دی؟ اوقدر یاخشی آرایابیلمه‌دیم. نه ایدی‌سه پالتارمالتار ایدی. قیرمیزی نوخودویا چالان کاپشن زاد… نه‌بیلیم یاددان چیخمیشدی یوخسا پارکا گلیب قاچانلارین ایدی؟ فرقی نه‌دی؟ منه یئتیشمیشدی. شالواردان زاددان وار بئلم. گئدیب ائوده باخارام دئیه یادیما توشدو یادیمنان چیخیب روزنامه‌می گؤتورم. گئری دؤندوم. زمزم‌دن آشاغی اوستونه «سینامال» یازیلمیش ساتیش مرکزی وار. دای بیلمیرم نییه «مال سینا» یازماییب‌لار…؟ بلکه ده اینگلیسجه‌دی. فارسجاسی بیریئره وارمیر آمما تورکجه‌سی آنلام قازانیر ان آزی. مال‌سینانین اؤنونده بیر دککه وار. روزنامه‌لری گلیب گئجه‌یاریسی قویور قاپیسینا. دککه یییه‌سی ساعت یئددی یاریم زاد گلیر. بو آرا بیردنه‌سی منه چاتسا نه اولار؟ همشهری‌دن، شرق‌دن، آفتابدان مافتابدان زاددان… اَن زهله‌سیزی آمما همشهری!
ائنیب طوسون جیحونا قاووشان بربرچی‌دن یاریم بربریمی آلیب بوکدوم جیبیمه. صوبحانه‌لر یئرآلما بلله‌سی… ایندیلر داها یاریم بربری ده چوخ گلیر. اوقدر صاباح گتیررم دئدیم کی اؤزلری اؤرگه‌شدیلر پاییمی آییرماغا. اوزآشاغی جیحوندا، هاشمی‌ده زاددا… چؤرکچی اوقدر وارکی یادلاریندان چیخا… آمما یاددان چیخار بیرگون ایکی گون اوچ گون… گون‌به‌گون اولماز! بیر ایکیسی بیلدییینی بیلدیردی. اوز تورشودونجا کسدیم اوردان یاریمیمی آلماغی. قالدی اوچو! نه اولسا نه اولسا هردن بیر فَتیر ده وئرر چؤرکچی‌لردن بیری. احمددی آدی مصطفی‌دی بیلمیرم. خوش گؤرونوش‌لو تازی دوروموندا دینگیلده‌یه دینگیلده‌یه کونده‌لری باسار یاییلسین. گولوشلری ایله یاریم بربریمی کسیب وئرر. دیشلریندن بیری قارالیب. آپار وئر دوکتوره گؤر نئجه سوخار… دیشین بیری بیرمیلیون! احمدیم منیم.
یئرآلمامی به هاردان گتیررم؟ او قالیب شانسا و بیرنئچه فاکتورا. اونسوز دا بیر دنه یئرآلمانین یوخ اولماسی نئیساندان یوک بوشالدان یاری یوخولو شاگیرد نه سئزر نه ده خبری اولار! بیلسه ده قاباقلایان اؤزوم اولارام. آلا سوخ گؤزووا.
صوبحانه‌می ترتمیز رادیومون سرسفئی سؤزلری و موسیقیسی سس‌سیزلییینده یئییب گیررم یئریمه. یورغانیمدی و خیال‌میال…
خیال هارا واراجاق؟ اصیل خیال دیشاری‌دا. ناهاردان سونرالاری خبردئیه‌نین لایلایی ایله بیر هوشلانیب سونرا چایدانین پیققاپیققینا قوناق اولارام. قیزیشیب دیزلریمی اووکالارام. یئنه خیاباندی یئنه من. ویترین‌لرین باغیشلادیغی کئیفه آیاقلاریمین سورونمه‌سینی یالوارارام. یاندان کئچنلری سئیر ائدرم. ائله باخارلار کی بئناوالار، سن‌دئمه هرشئی شیشه‌لرین دالیندا ایشیلداییر اونلارین وارلیغی‌دیر! چلینگ الیمده چالیشارام قارنیما یا دا بئلیمه قویان الی تیتره‌مز ساخلاییب دیک دیک یئریییم.
ناهاردان سونرالار جیحون بیرآز تانینماز گلیر آداما. او اوزدن سلسبیل‌دی، خوش‌دو، قصر الدشت… بونلاری، اؤزلجه ده سلسبیلی گزر دولانارام. جیحون تانیشلیق وئرمیرسه سلسبیل سرخوشلوق باغیشلاییر اَن آزی. لاپ قاران قاووشانا قدر! سلسبیل اوجرَت‌سیز کئیف باغیشلاماقدا قاینار بولاق‌دی. گؤزللرین اؤزلرینی اؤزگور دویدوغو یئر… اوزونو ایله گوده‌سی. ساللانا ساللانا، دومبالا دومبالا، بیر یانا بیر بَری‌یه وورا وورا… ساغ سول ساغ سول… دالغا دالغا. گئجه‌نین بیرقدَری گئدینجه گل گئت. بیتیب توکنمز کئیف! بوددو بالدیردی ممه‌دی… هامیسین اوزه‌ریندن پیشمیش باقالانین قوخوسو، رنگی ده چوغوندوروندو کسین. قان قیرمیزی. قاینارجا. دیرناق اوجو بیرآز دا بالدیرغان… دوز! گؤت‌باش اولوب سولانیرسان… تپه‌دن دیرناغا. گیزیلتی قانی قاینادیر یئنه! آی سحرسحر بهنود پارکیندا جوشا جوشا ترپه‌نن جئیرانی بیر توتوب سیخاسان دئییرسن… باشدان اته‌یه… اتک‌دن باشا. دال قاباق… دال قاباق…
ویترین‌لر سونسوز یاشام طرزینی رئکلام ائتمک‌ده‌دیر. همشه‌لیک سعادت، خوشلوق… ایشیل ایشیل. رنگ‌به‌رنگ. کتانی‌نی آلیب سئوینه سئوینه قاچیب، ایچینده همشه جاوان قالاجاق‌سان، تر تؤکوب بیر قاچماقدان دایاناندا خانیم قیز بری یاندان باخاجاق کی… بیر گولوش سن بیر گولوش او… صاباحی گون یئنه بیر گولوش و دیل اوجو سلاملاشما. داها سونرا گؤروشلر…. قاچیشلار… بیرلیکده ترتؤکمه‌لر… دینگیلیم آتمالار… آتیلیب توشمه‌لر… ایدمان قیافه‌تی قول‌بودو بیر قات داها قول‌بود گؤستریر، سؤزسوز. بیر داها جئیران اویلاغینا گئدیب پارکی آراسام… آمما داها قاران قاووشوب. قارانلیق هر شئیی یوخ ائتمک‌ده. لذتین ده سونو وارمیش سن دئمه. داها گئجه داها درد… داها گئجه داها آغری…
ایچ ایچه قاووشوب سرسم اولونجا ایی قوخو و لذتی بوراخیب سونوندا (سیزیلتی‌لار یاخشی‌جا قالخاندان سونرا) چؤنَرم آذربایجانا. جیحونو دیزآغری ایله اوزآشاغی، قارانلیغین پیشیک کیمی اوزگؤزه جیرناق آتان چاغ یوواما سیغینارام. گئجه‌دی تکلیک… گئجه‌دی یالقیزلیق… گئجه‌دی یورغان آلتیندا سیزلاماق… اوخشاییب اویوماق… یاندان یانا چؤنمک… گئجه‌دی مین‌بیر درد. بیر زامان اویانیب گؤررم کی یاتمیشام… ایللاه بیللاه ایله دوروب مثانه‌می بوشالدارام. گیریب یاتارام. ایکی ساعت‌دن سونرا بیر داها… و صوبحه قدر تا گون چیخینجا. آنجاق ائرته‌دن دورارام.
به نقل از «آوای تبعید» شماره ۲۳
[۱] – دوغوم : ۱۳۶۳ (۱۹۸۴) قیزیل قالا کندی (آذربایجان شرقی ـ قارا آغاج)
چئوره موهندیسلییی ـ هاوا کیرلیلیگی (مهندسی محیط زیست ـ آلودگی هوا) قولوندا یوکسک لیسانس
کتابلار: قلمه‌قوزان ۲۰۱۶ (رمان) / اولدوزلاردان بیری قایمیشدی ۲۰۱۶ (حیکایه توپلوسو) / یول آیریجیندا یازیلمیش حیکایه‌جیک‌لر ۲۰۱۶ (بئش یوز کلمه‌دن آز حیکایه‌جیک‌لر)
داغیتماغا دوغرو:۲۰۲۰ (ادبی اله‌شتیری مقاله توپلوسو)
