ایلقار مؤ‌ذن‌زاده؛ تونل
ایلقار مؤ‌ذن‌زاده[۱]
تونل
گوللـه کیمی گئدیرم. تونلین سونوندا اینجه ایشیق گؤرسه‌نیر. اوزوندور. قاییدیرام. تانیشلارین هئچ بیری یوخدور. مزارلیغا گئدیرم. خلوت نظره گلیر. بیر بوجاقدا نئچه نفر توپلانیب. ترحیم بیلدیریسی هله چاپ اولماییب. بیرازدان باسدیرماق ایسته‌ییرلر. قارایا بورونموش مئییتی قویویا ساری آپاریرلار. کاور ایچینده دارتینیرام. آیاغا قالخیب جنازه‌مه باخماق ایسته‌سمده، قارشیمدا هانسیسا گوجلر قاباغیمی آلیر. اوره‌ییمه قورخو هوپور. اندامیم پارچالانیب، قیافه‌مین فورمدان چیخماسی فیکریندن هورکورم بیر آن. کرونا خسته‌لیییندن اؤلن کیمسه‌نین نه دورومدا اولدوغونو دا بیلمیرم. سون زامانلار اودلاییرلار جنازه‌نی ائشیتمیشدیم. جانیما وحشت دولو بیر دویغو هوپور. قارا کاور ایچینده اولدوغوما بیلینجلی اولسامدا، ذره قدر ده ترپنه بیلمیرم. هئچ ده فیکر ائله‌مزدیم، اؤلومون بو قدر یاخین، بونجا نامرد اولماسیندان. گؤز قیرپیمیندا حایاتیما سون قویوب، دونیادان ویداعلاشماغیمدان.
مئییت‌خانانین سویوق و ازدحاملی چئوره‌سینده ایدیم. آییلیب امکداشیمی گؤرموشدوم. اوردان اوزاقلاشیب اورژانسین شیشه دووارلی پارتیشنینه دایانمیشدی. الجکلی الی ایله ماسکینی بورنونون اوستونه چکیب، اللرینی قوینونا قویموشدو. قارداشیملا داییم ایسه، الده اؤلوم بلگه‌سی بیر اوتاقدان باشقا اوتاغا گئتمکده ایدیلر. بیر بسته‌لی اشیانی هانسیسا گمرکدان ترخیص ائتمه‌یه چالیشان کیمی، سورعتله اوتاقدان اوتاغا، سالوندان سالونا گئدیب، باسدیریلماق ایشیمه لازیم اولان دیلکچه‌لری آلیردیلار. سانکی بیراز دا قالسام جریمه اولوب، اللرینده خرج اولاجاقدیم. ده‌یرسیز بیر اشیا، یوخسا میندار بیر لئشه چئوریلمه‌ییمدن، دهشتلی دویغولار جهنمینده آلیشماق اوزره ایدیم. هر نه دن چوخ گوشیمده‌کی مئساژلاریمین اوخونماسی وحشتیندن قرارسیز ایدیم. آروادیمین یانیندا یالنیز قارداشیملا داییم وار ایدی. «آللاه رحمت ائله‌سین، یاخجی آدام ایدی» دئیه‌ن ده یوخ ایدی. کاور ایچینده للک یونگوللویونده ایدیم. منسیز بیر آن بئله یاشایا بیلمه‌ین حایات یولداشیم اوز گؤزونو دیدیردی. دیرناغینی یاناقلاریندان بوینونا کیمی چکمیشدی. اوزو اوچ یاشلی آیلار قیزیمین رسیم دفتری کیمی جیزیق جیزیق ایدی. میدادین اوجونو احتیاط‌سیز چکیب کاغاذی یارالایان آیلار کیمی، دیرناقلاری اوزونون هر طرفینی قاناتمیشدی.
عؤمور بویو آبیرلی اؤلمک ایسته‌سم ده، ایندی بو آن بیلینمز طالعلر هیجانیندا جنازه‌می ایزله‌ییردیم. قارقیشلا نیفرتین منه ساری یاغیلماسینی دوشونوردوم. چاره‌سیز آییقلیغیملا بیرگه، ایشیق سورعتینده مزارلیغین دؤرد بیر یانیندا دولانیردیم. رویانین هئچ کارینا دا دئییلدی. اؤلوم خبریمی ائشیدندن سونرا موبهم باخیشلارینی اوزاندیغی یاتاقدا سقفه زیلله‌ییب آه چکمیشدی. سون زامانلار ائویمیزه گلیب گئدن حایات یولداشیمین خالاسی‌قیزی ایله ایلگییه کئچدیییم رویا. گؤزللیک تانریچاسی ایدی. ایلک گؤردویومده اوره‌ییم قیریلیب یئره دوشموشدو. حایات یولداشیملا دانیشیغا آلیشاندا، گؤزونو اوغورلاییب، رویانین گؤزللییینده محو اولماق چاباسیندا ایدیم. اوزبه‌اوز موبلدا اوتوروردوم. سونرالار واتساپدا یازیشماغا باشلاییب عاطیفی ایلیشگییه ده کئچمیشدیک. مئساژلارین هامیسی گوشیمده قالمیشدی. یقین کی حایات یولداشیم گؤرسه، گوروما لعنت کی هئچ، آبریمی دا آپاراجاقدی.
گئتدیکجه سیزاق بیر سویوق هر یئریمی بورویوردو. قولوم باغلی، قیچیما کفن ایپی ساریلمیش. قارانلیغین ایچینده حرکتسیز اوزانمیشدیم. کاور ایچیندن سقفده‌کی آغ مهتابی‌نین ضعیف ایشیقلارینی سئزه بیلسمده، یئریمدن ترپنه بیلمیردیم.
سویوقدان دونماق اوزره ایدیم. قارا کاورین ایچینده قول قیچیمی باغلاییب، زیپینی چکمیشدیلر. ذره قدر ده ترپنمه‌یه ایمکانیم یوخ ایدی. دیزینه دؤیوب آغلایان آروادیمین یانیندا قارداشیملا داییم سوسموشجاسینا دایانمیشدی. گوشیمی آچاندان سونرا یوزهشتاد درجه فرقلنمه‌سینین عذابلی فیکریندن قوپا بیلمیردیم. درین فیکیره دالمیش دوستلاریمدان هئچ بیری آغلامیردی. سئوینه‌نی ده وار ایدی. تکه توک گلن دوستلار الده الجکله اوزده ماسک، ماشینلاریندا اوتورموشدولار. گئجه اؤلموشدوم. ندن اؤلدویومو بیلمه‌سمده، جنازه‌م هله بیماریستاندا ایدی. آنام دیری ایکن، اؤلدوکدن سونرا تاپیشیب گؤروشمه‌ییمیز اوچون دانیشمیشدیق بیر زامان. امکداشیم گئدیب ماشیندا اوتوروب. قارداشیملا داییم خسته‌خانانین سالونوندا الی قوینوندا دایانمیشدی. آنام همشه «شلوغ ائله‌مه، شیشدن قال بیر یئرده، اؤزوندن چیخیبسان؟» دئییه‌ردی. جنازه‌مه یاخینلاشا بیلمه‌مه‌ییمین اساس قورخوسو، اؤلوم عیللتینی بیلمک ایدی. گاز بوغما قضاسیندان‌می، یوخسا تصادوف؟ قتل؛ سکته، کرونامی یوخسا؟
***
سالونلاردا ایشیق سورعتی ایله قاباغیمدان سوووشان روحلار اؤزگه گلیر. یاشلی قوجا بیر روحون قاباغینی آلیب آنامی سوروشورام. غریب دیلده دانیشیر. ایلگییه کئچه بیلمیرم. یقین کی یالنیز آنام دونیایا نئجه قاییدا بیلمه‌ییم حاقدا منه یاردیم اولا بیلر. بورولقان بیر دره‌یه دوشن کیمی فیرلانیرام ایچیمده، سونرا بوراخیلیب اوزون تونله ساری آخیرام.
روحلار قبیرلر اوسته آری پته‌یه دولوب بوشالان کیمی فیرلانیر. آخشام اولوب. مزارلیغا یؤنه‌لن خیابانین بولوارینداکی چیراقلار، گؤزلرینی آچیب بیر بیر یانیرلار. قبیرلرین چوخو روحسوزدور. روحلاری چیخیب گئدیب، قارا تونلی سوووشوب دئمک. چوخلاری‌نین دا پریشان روحو اورا بورا اوچماقدادیر. اؤلولرین گؤزلری‌نین آچیلماسی قبیر ایچینده بیلینمه‌سه ده، روحلار بونو حیس ائلیه بیلیر.
کابوسوم گئرچکله‌شیب، باش وئرمه‌یه‌جک ایش ایسه باش وئریب. باسدیریب ائوه قاییدیبلار.
موبایلیم حایات یولداشیمین قارا کیفینده‌دیر. قارا جعبه کیمی آچیلدیقدان سونرا چوخ شئیلری بلیرله‌ده بیلردی. اورتالیق خلوت اولاندان سونرا یقین کی آچاجاق. خاطیره‌لریمیزی نظردن کئچیریب گالئری‌ده‌کی بوتون شکیللریمیز یانیندا، خالاسی قیزینین لوت اندامینی گؤردویونده، قیافه‌سینین نه فورما دوشه‌جه‌یینی دوشونورم. یئر کوره‌سینی گؤز قیرپیمیندا فیرلانیب، بوتون مکانلارا احاطه‌م اولا بیلیر. آنامی هئچ یئرده تاپا بیلمیرم. مزارلیقدان ائوه ساری گئدن یول، اوزون بیر اوتوبان بویوندادیر.
هاواسیز بیر بوشلوقدا یئرییه‌رکن، اوچماغا چئوریلیردی آددیملاریم. آراسیرا قویوق کیمی، ایشیغین ذره‌لرینده اوتوروب سوزوردوم. دالبادالا دوزولن بولوار چیراقلارینی یولدا قویوب گئتسمده، داها اولمایان کؤلگه‌م اوزونلاییب گوده‌لمیردی. ائوه یئتیشمیشدیم. ایللر اؤنجه حایاتینی ده‌ییشمیش آنام قاپیدا دایانمیشدی. سانکی دونیانی وئرمیشدیلر. سئوینجدن ایشیق سورعتینده آناما یاخینلاشمیشدیم. گولومسه‌میشدی:
«شلوغ ائله‌مه، شیشدن قال بیر یئرده، اؤزوندن چیخیبسان؟» دئمیشدی.
«اؤزومدن چیخمیشام آنا. اندامیمدان چیخمیشام. آمما، قاییتماق ایستیرم نه ایسه.»
«گئجدیر اوغلوم، باسدیریبلار، دونن قاییدا بیلردین.»
ترحیم اعلامیه‌می یاپیشدیریرلار. قاپییا قارا چکیلیر. حالین اورتاسیندا خورما حالوا قویسالار دا، هئچ کیم یاس تؤره‌نیمده ایشتیراک ائتمه‌ییب. یالنیز لاپ یاخین آداملاردیر.
حایات یولداشیم حالین بوجاغیندا بوینو بوکوک اوتوروب. آغلاماقدان اوزو شیشیب. قارا کیف یانیندا دئییل. یورقان دؤشک یوکونون آراسینا تپیبلر. خالام اوغلو قرآن جوزوه‌لری الینده، ستونون یانیندا دایانیب. ایشیندن قالدیغی اوچون، جنازه‌مه یامان دئییر اوره‌یینده. نؤوحه اوخویان گلیر. آنام ایچیمه هوپور:
«اوچ گون سونرا هرنه قورتاریر. ابدی‌لیک اونودولورسان. بیلینجیمده اوتور. باخ سنی گؤزله‌دیییم ایللرین عذابینا. بوردا میلیونلار روح، انداملارینا قاییتماق اومودو ایله یئر کوره‌سینده قالیب، تونلی سوووشماییبلار. تونلین اوتایی قاییدیلماز مکاندیر. بوردان داها گؤزل یئر. آزاد، یوموشاق، شن و موتلو. قارا دلیک کیمی‌دیر. سومورولورسان و قوپورسان بوردان، سونرا ملکوت‌لاری سئیر ائدیرسن. سنی گؤزله‌مک اوچون سرگردان روحلارین یوروشلرینه دؤزوب عذابلار چکمیشم. بوراسی تام جهنمین اورتاسی. بوراسی یالقیزلیق، کیفایت‌سیزلیکدیر. گل اوغلوم، تونلدن سوووشمالیییق. زامان قفسینده گیریفتارلیقدان قوپمالی، بوردان آیریمالیییق. موتلولوق زامانسیزلیقدا. کئچمیش حسرتیندن قوپوب، گله‌جک دردیندن آیریلماقدادیر. جهنم ویجدانسیزلیق، جننت ایسه صداقتدیر.
آنام اؤلوم سونراسینداکی دونیادا دا فلسفی دانلاقلارینا داوام وئریردی. بئزیردیم. سؤزلرینی باشا دوشموردوم. اوشاقلیغیم کیمی. هانسیسا بیر خطا چیخارتدیغیمدا دانلاماغا باشلاردی. بیر قولاغیم قاپی اولاردی، اوبیری دروازا. سانکی دیققتله قولاق آسیرام کیمی داوراناردیم. سؤزلرینین قورتارماسینی گؤزله‌یردیم، کی اؤزومو اَزدیریب ایسته‌ییمی سوردورم. سونرا گیزله‌دیلمیش اویونجاقلاریمی آلیب، محلله‌یه گئدم. ائوجیک ائوجیک اوینایام.
آناما هوپورام:
«آمما اندامیمی سون دؤنه اولاراق گؤرمک ایستیرم…»
گؤز قیرپیمیندا بدنیمه ساری یورودولورم. اوستومه سریلمیش قارا پتو بؤیرومه دوشور. آنام اوزاقلاشیر. اوزون بیر تونلین سونوندا یوخ اولور. نه
قدر چاغیرسامدا سسیم چیخمیر. گؤزلریم آچیق، بوتون گوجومله ساغ الیمی قالدیرماق ایسته‌سمده، عاجیز مئییت کیمی یاتاقدایام. دیشلریم قیفیللانیب. نفسیم کسیلمکده‌دیر. ویبره‌یه دوشموش اندامیمی چتینلیکله ترپه‌دیرم. آروادیم منه ساری دؤنور. بالیشین آلتینداکی گوشیمه گلن مئساژ ویبره ائدیر…
۹۹-باهار-اردبیل
به نقل از «آوای تبعید» شماره ۲۳
[۱] – دوغوم:۱۳۶۳ (۱۹۸۴) خیاو (مشکین‌شهر)
فارغ‌التحصیل مهندسی عمران، کارشناس روانشناسی عمومی و کارشناس ارشد روانشناسی بالینی
کتاب‌‌لار: اوره‌یینه دؤنوشسوز بیلیط ۲۰۱۷ (شعر مجموعه‌سی) / جاده ۲۰۲۰ (حیکایه‌جیک‌لر)
